Novi krug lažnog Robina Huda: Bendelađ nije osuđen na smrt niti je bio heroj

Savremeno društvo često traži svog Robina Huda, a uloga ovog heroja koji je krao od bogatih i davao siromašnima na društvenim mrežama često se dodijeli nekome ko je ne zaslužuje. Ovoga puta uloga Robina Huda dodijeljena je hakeru Hamzi Bendelađu tako što se fotografija njegovog hapšenja na Fejsbuku podijelila skoro 400 puta uz opis:  To čak …

150

Savremeno društvo često traži svog Robina Huda, a uloga ovog heroja koji je krao od bogatih i davao siromašnima na društvenim mrežama često se dodijeli nekome ko je ne zaslužuje.

Ovoga puta uloga Robina Huda dodijeljena je hakeru Hamzi Bendelađu tako što se fotografija njegovog hapšenja na Fejsbuku podijelila skoro 400 puta uz opis:



„Hamza Bendelladj je čovek koji je hakovao 217 banaka i uzeo im 4 milijarde dolara. Sav “ukradeni” novac je poklonio narodu Afrike i Palestine. Osuđen je na smrtnu kaznu“.

 To čak i nije jedina verzija ove neistine. U drugoj, sličnoj verziji, ponavlja se tvrdnja o hakovanju banaka i poklanjanju novca ljudima u Africi i Palestini, ali se kaže da je Bendelađ osuđen na doživotnu robiju.

Ipak, nijedna od ovih verzija nije tačna.

Istovjetna fotografija Bendelađa sa sličnim tvrdnjama kružila je internetom o 2019. godine kada je raskrinkao AFP.

Bendelađ jeste bio haker i jeste upadao u sisteme banaka i krao podatke sa kartica i bankovnih računa, samim tim i novac, ali nije osuđen niti na doživotnu robiju niti na smrt, već na 15 godina zatvora.

Bendelađ je sa još jednim hakerom osuđen je za krađu ličnih podataka za identifikaciju blizu pola miliona ljudi, podatka sa kreditnih kartica i bankovnih računa čime je doveo do milionskih gubitaka, kako pojedince tako i banke. Bendelađ se na suđenju izjasnio krivim.

Da nije u pitanju nikakav heroj naroda, potvrdila je i tajlandska policija koja ga je uhapsila u toj zemlji, saopštavajući da im je Bendelađ kazao da je novac pribavljen hakovanjem trošio na putovanja i luksuzan život.

Legenda o hakeru koji otima od banaka i daje siromašnima pojavljivala se i u drugačijem obliku, odnosno sa drugačijom fotografijom, odnosno fotografijom čovjeka koji se smije na vješalima. Na toj fotografiji nije Hamza Bendelađ već Iranac koji je 2007. godine osuđen na smrt zbog ubistva sudije.

Ovu objavu ocijenili smo kao lažnu vijest.

Ocjenu “Lažna vijest” dobija originalni medijski izvještaj (u potpunosti proizveden od strane medija koji ga je objavio) koji u sebi sadrži činjenično pogrešne tvrdnje ili informacije. Za sadržaje koji se ocjenjuju kao lažne vijesti može se pouzdano utvrditi da su kreirani i diseminirani sa namjerom da dezinformišu javnost, to jest da tvrdnju koja je u potpunosti lažna predstave kao činjenicu.

Autor:

Darvin Murić

Objavljeno:

03/06/2021

Ocjena:

Lažna vijest