Kovid ne mari za sukobe i rat

Izrael je već duže vrijeme u fokusu medija i korisnika društvenih mreža, zbog uspješne akcije vakcinacije ali još više zbog sukoba sa Palestincima u pojasu Gaze. Na društvenim mrežama se čak i izraelsko-palestinski sukob koristi u svrhu dezinformisanja javnosti o koronavirusu. Jedan Facebook korisnik u objavi od 15. maja kaže: Novi izraelsko-palestinski sukob počeo je 10. maja, nakon više …

316

Izrael je već duže vrijeme u fokusu medija i korisnika društvenih mreža, zbog uspješne akcije vakcinacije ali još više zbog sukoba sa Palestincima u pojasu Gaze.

Na društvenim mrežama se čak i izraelsko-palestinski sukob koristi u svrhu dezinformisanja javnosti o koronavirusu. Jedan Facebook korisnik u objavi od 15. maja kaže:



„Izrael – zanimljivo! Korone više nema tamo! Korona se sad malo povukla, ne voli biti tamo gde su sukobi!“

Novi izraelsko-palestinski sukob počeo je 10. maja, nakon više sedmica napetosti između Palestinaca i Izraelaca. Najmanje 232 osobe poginule su u Gazi, uključujući 100 žena i djece, pokazuju podaci palestinskih zdravstvenih zvaničnika. U Izraelu je poginulo 13 osoba.

Prema podacima Svjetske zdravstvene organizacije, u Izraelu je 10. maja registrovan 231 novi slučaj koronavirusa, a od tog dana, odnosno početka sukoba, pouzdani podaci nijesu dostupni.

Ljekari bez granica su 3. maja upozorili na zabrinjavajući porast slučajeva COVID-19 u Gazi, gdje se stanje u aprilu znatno pogoršalo širenjem novog soja virusa.

Razlog zbog kog nije jasno koliko je ljudi od početka sukoba zaraženo upravo leži u oružanom sukobu i posljedicama koje ostavlja – nasilje između Izraela i Hamasa gotovo je u potpunosti eliminisalo testiranje i brigu o COVID-19 u Gazi, čineći gotovo nemogućim dobijanje tačnih informacijama o oboljelima.

Bolnica Hala Al Shwa, koja je stanovnicima Gaze obezbjeđivala testiranje na koronavirus i vakcinaciju, uništena je u vazdušnim napadima, put koji je vodio do bolnice al-Shifa u Gazi je oštećen, a jedina laboratorija za obradu testova COVID-19 u Gazi je privremeno zatvorena, o čemu su izvijestili brojni svjetski mediji 18. maja. Majdi Dhair, direktor odjeljenja za preventivnu medicinu u tamošnjem ministarstvu vjeruje da je oprema unutar laboratorije neoštećena, ali je naglasio da će trebati najmanje jedan dan da se šteta sanira i laboratorija pripremi za ponovnu obradu testova na koronavirus. U međuvremenu, rekao je, medicinski timovi prestali su da testiraju na koronavirus. Laboratorija takođe privremeno neće moći da testira na HIV, hepatitis C i mnoge druge viruse.

Ujedinjene nacije navode da su u Gazi obustavljene i sve vakcinacije protiv COVID-a, a gotovo 60.000 Palestinaca raseljenih zbog sukoba u velikom broju slučajeva sklanjaju se u improvizovana skloništa koja bi mogla postati mjesta za širenje virusa. „To zaista šteti cjelokupnom funkcionisanju tamošnjeg medicinskog sistema. COVID-19 je pomalo stavljen po strani jer ima ranjenih i mrtvih. Ograničeni kapaciteti za borbu sa COVID-om sada gotovo da i ne postoje“, rekao je Hadas Ziv iz neprofitne organizacije Ljekari za ljudska prava, sa sjedištem u Jafi.

Ely Sok, koja rukovodi misijom Ljekara bez granica, kaže da je broj pozitivnih slučajeva potcijenjen i nerealan, kao i da očekuje porast broja teških slučajeva koji zahtijevaju hospitalizaciju.

Takođe, u Izraelu je već većina stanovništva vakcinisana protiv COVID-19, što takođe svakako doprinosi smanjenju broja slučajeva zaraze koronavirusom.

Ovu objavu ocjenjujemo kao teoriju zavjere. Tu ocjenu dobija medijski izvještaj koji daje neistinit ili neprovjerljiv opis neke pojave, događaja ili osobe, predstavljajući ih kao dio ili rezultat skrivenog plana (“zavjere”). Za ovakve sadržaje karakteristično je da iznose niz tvrdnji, predstavljenih kao činjenice, između kojih se utvrđuju uzročno-posljedične veze, bez nuđenja bilo kakvih kredibilnih dokaza.

Autor:

Darvin Murić

Objavljeno:

25/05/2021

Ocjena:

Teorija zavjere